УЗУН ТЕЗИМ

 

Улуг Таңдым байлак эдээн
Угулзалай батса-батса,
Успа хөлдү чуруп каастаан
Уран шевер узун Тезим.

Таңды, Көгей халышкының
Тайбың ижин ырлап чыдар,
Авазының кызы ышкаш,
Арыг кылаң узун Тезим.

Моол-Совет найыралдың
Могаг билбес күчүзү дег,
Төнмес, соолбас тайлып чыдар,
Төрээн ынак узун Тезим.

Эгүүр шагдан кожа-хелбээ
Найыралдыг Тыва, Моолче

Эрииң шөлүң шыва берген

Напчы чечээң сун-на, Тезим.
Эрииң шөлүң шыва берген
Напчы чечээң сун-на, Тезим.

 

           ЧЕЧЕН ДОМАКТАР

 

Шак чокта хүн узун,
Шаг чокта иш узун.

Кыстың чаражы сеткилинде,
Сөстүң чаражы чеченинде.

Суг суук-даа болза, чемге херек,
Сын бедик-даа болза, чуртка херек.

Эштиң экизи бөдүүнүнде,
Эттиң экизи шынарында.

Шапты балды бутка айыылдыг,
Чашпаа кижи эшке айыылдыг.

Дүште шын чок,
Дашта сан чок.

Сагыжы бактың караа соок,
Соңгазы бактың өрээли соок.
Эртем чокта угаан шапты,
Эгээ чокта хирээ шапты.

Аъдыңны камнаар дизиңзе, чортуп чор.
Адыңны камнаар дизиңзе, төлептиг чор.

Бак кижи эжин сөглээр,
Бак ыт ээзин ээрер.

Чадаң ыяшта девээ чок,
Чанган кушта өртээл чок.

Бажың чокта дыш чок,
Баалың чокта өң чок.

Кырый бергеш, минни бээр сен,
Кырны ашкаш, көре бээр сен.

Чонарның мурнунда көрүп ал,
Кезерниң мурнунда хемчеп ал.